വയനാട് ജില്ലയിലെ ആദ്യത്തെ ‘നഗരവനം’ മാനന്തവാടിയില്‍ ഒരുങ്ങുന്നു. നോര്‍ത്ത് വയനാട് വനംഡിവിഷന്‍ ഓഫീസ് കോമ്പൗണ്ടിലാണ് നഗരവനം ഒരുക്കുന്നത്. ടൂറിസം വികസനത്തിനൊപ്പം പൊതുജനത്തിന് ഇത് ഏറെ ഉപകാരപ്രദമാവും.
കേന്ദ്ര വനംപരിസ്ഥിതി മന്ത്രാലയം അനുവദിച്ച 40 ലക്ഷംരൂപ ഉപയോഗിച്ചാണ് നഗരത്തോടുചേര്‍ന്നുള്ള വനംവകുപ്പിന്റെ സ്ഥലത്ത് നഗരവനംപദ്ധതി നടപ്പാക്കുന്നത്. പ്രവേശന കവാടം, നടപ്പാത, ഇരിപ്പിടങ്ങള്‍, ഏറുമാടം, മനോഹരമായ ലാന്‍ഡ്‌സ്‌കേപ്പിങ് വിവിധയിനം പൂച്ചെടികള്‍, കഫ്റ്റീരിയ, ടിക്കറ്റ് കൗണ്ടര്‍, ശൗചാലയം, മൃഗങ്ങളുടെയും പക്ഷികളുടെയും ചിത്രങ്ങള്‍, പ്രതിമകള്‍ എന്നിവ ഇവിടെ ഒരുക്കിയിയിട്ടുണ്ട്. അപൂര്‍വയിനം പക്ഷികളുടെ ആവാസകേന്ദ്രവും വ്യത്യസ്തമായ ഔഷധച്ചെടികളുമുള്ള വനത്തിലൂടെയുള്ളനടത്തം വേറിട്ട അനുഭവമാണ് നല്‍കുക.
പ്രകൃതിയെയും പരിസ്ഥിതിയെക്കുറിച്ചും വിദ്യാര്‍ഥികള്‍ ഉള്‍പ്പെടെയുള്ളവര്‍ക്ക് അവബോധം നല്‍കുകയെന്നതും നഗരവനംകൊണ്ട് ലക്ഷ്യമിടുന്നുണ്ട്. ഇവിടെയുള്ള വൃക്ഷങ്ങളെ ക്കുറിച്ചുള്ള വിശദമായവിവരങ്ങളും പ്രത്യേകതകളെക്കുറിച്ചും രേഖപ്പെടുത്തും
നഗരത്തിലും സമീപ പ്രദേശങ്ങളിലുമുള്ളവര്‍ക്ക് വൈകുന്നേരങ്ങളില്‍ സമയം ചെലവിടുന്നതിനുസൗകര്യമുണ്ടാകും. 600 മീറ്റര്‍ ദൂരംവരുന്ന മരങ്ങള്‍ക്കിടയിലൂടെയുള്ള നടപ്പാത പൊതുജനത്തിന് പ്രഭാത സവാരിക്കായും നല്‍കും. ബ്രിട്ടീഷ് സ്മരണകളുയര്‍ത്തുന്ന ഡി.എഫ്.ഒ. ഓഫീസ്, ഡി.എഫ്.ഒ. ബംഗ്ലാവ് എന്നിവ കൗതുകമാകും. പ്രകൃതിസൗഹൃദമായുള്ള നിര്‍മാണ പ്രവൃത്തികളാണ് നടത്തിയിട്ടുള്ളത്. അന്തര്‍സംസ്ഥാന പാതയായ മാനന്തവാടി-മൈസൂരു റോഡരികിലായി ഒരുക്കുന്ന ‘നഗരവനം’ ഏറെതാമസിയാതെ പൊതുജനത്തിനു തുറന്നു നല്‍കാനാണ് വനംവകുപ്പ് ആലോചിക്കുന്നത്.
