ഇന്‍സ്റ്റഗ്രാം റിച്ച് ലിസ്റ്റില്‍ ആദ്യ നൂറ് പേരുടെ പട്ടികയില്‍ ഇടം നേടി ബോളിവുഡ് താരം പ്രിയങ്ക ചോപ്രയും ക്രിക്കറ്റ് താരം വിരാട് കോഹ്‍ലിയും. പോസ്റ്റുകളില്‍ നിന്ന് ലഭിക്കുന്ന വരുമാനത്തിന്റെ അടിസ്ഥാനത്തില്‍ രൂപീകരിച്ച റിപ്പോര്‍ട്ടാണ് ഇന്‍സ്റ്റഗ്രാം റിച്ച് ലിസ്റ്റ്. ഇത് പ്രകാരം, ഇന്‍സ്റ്റഗ്രാമില്‍ 255,269,526 ഫോളോവേഴ്സുമായി 14-ാം സ്ഥാനത്താണ് വിരാട് കോഹ്‍ലി. ഇന്‍സ്റ്റയിൽ 88,538,623 ഫോളോവേഴ്സുള്ള പ്രിയങ്ക 29-ാം സ്ഥാനത്താണ്.
ഒരു പോസ്റ്റിന് 1,384,000 ഡോളറാണ് വിരാട് കോഹ്‍ലി സമ്പാദിക്കുന്നത്. പ്രിയങ്ക ചോപ്ര ഒരു ഇന്‍സ്റ്റഗ്രാം പോസ്റ്റിന് 532,000 ഡോളര്‍ സമ്പാദിക്കുന്നു. 2021 ലെ സമ്പന്നരുടെ പട്ടികയിലും ഇരുവരും ഇടം നേടിയിരുന്നു. അന്ന് 23ാം സ്ഥാനത്തായിരുന്നു കോഹ്‍ലി. ഹോപ്പര്‍ ഇന്‍സ്റ്റഗ്രാം റിച്ച് ലിസ്റ്റില്‍ ഏറ്റവും ഉയര്‍ന്ന റാങ്കുള്ള ഇന്ത്യക്കാരനും വിരാടാണ്. ഓരോ പ്രൊമോഷണല്‍ പോസ്റ്റുകള്‍ക്കും ഷെയര്‍ ചെയ്യുന്ന ഫോട്ടോകള്‍ക്കുമായി അഞ്ച് കോടിയിലധികം രൂപയാണ് പ്രതിഫലം വാങ്ങുന്നത്. 2019ല്‍, ഏറ്റവും കൂടുതല്‍ എന്‍ഗേജ്മെന്റുള്ള അക്കൗണ്ടിനുള്ള അവാര്‍ഡും വിരാടിനായിരുന്നു.
പ്രൊമോഷണല്‍ പോസ്റ്റുകള്‍ക്കും ഫോട്ടോകള്‍ക്കുമായി മൂന്ന് കോടിയാണ് 2021 മുതല്‍ പ്രിയങ്കയ്ക്ക് ലഭിക്കുന്നത്. 596,848,846 ഫോളോവേഴ്സും ഒരു പോസ്റ്റിന് 3,234,000 ഡോളറും സ്വന്തമാക്കുന്ന ഫുട്‌ബോള്‍ താരം ക്രിസ്റ്റ്യാനോ റൊണാള്‍ഡോയാണ് ഹോപ്പര്‍ ഇന്‍സ്റ്റഗ്രാം റിച്ച് ലിസ്റ്റിൽ ഒന്നാമത്. ഒരു ഇന്‍സ്റ്റഗ്രാം പോസ്റ്റിന് 2,597,000 ഡോളര്‍ ഈടാക്കുന്ന ഫുട്‌ബോള്‍ താരം ലയണല്‍ മെസി രണ്ടാം സ്ഥാനത്താണ്. നിലവില്‍ 479,268,484 ഫോളോവേഴ്സാണ് മെസിക്കുള്ളത്.
