സമൂഹമാദ്ധ്യമങ്ങളിൽ ഏറെ ആരാധകരുള്ള താര കുടുംബമാണ് നടൻ കൃഷ്ണകുമാറിന്റേത്. കൃഷ്ണകുമാറിനെ പോലെ തന്നെ ഭാര്യ സിന്ധുവും മക്കളും മലയാളികൾക്ക് ഏറെ സുപരിചിതരാണ്. സിന്ധു കൃഷ്ണകുമാറും മക്കളായ ആഹാന, ദിയ, ഇഷാനി, ഹൻസിക എന്നിവരെല്ലാം തന്നെ തങ്ങളുടെ യൂട്യൂബ് ചാനലുകൾ വഴി സമൂഹമാദ്ധ്യമങ്ങളിൽ സജീവമായി ഇടപഴകുന്നവരാണ്. ഇപ്പോൾ സിന്ധു കൃഷ്ണകുമാർ വെളിപ്പെടുത്തിയ ഒരു കാര്യമാണ് സമൂഹമാദ്ധ്യമങ്ങളിൽ ചർച്ചയാകുന്നത്.
സിന്ധുവിന്റെയും മക്കളുടെയും ആരാധകർക്ക് എന്നും ആകാംക്ഷയുള്ള ഒരു കാര്യമായിരുന്നു കൃഷ്ണകുമാർ കുടുംബത്തിലെ പെൺകുട്ടികളുടെ വിവാഹം. കൃഷ്ണ സഹോദരിമാർ എന്നറിയപ്പെടുന്ന ഇവരിൽ ആരായിരിക്കും ആദ്യം വിവാഹം കഴിക്കുക എന്നുള്ള ചോദ്യത്തിന് ഉത്തരവുമായി എത്തിയിരിക്കുകയാണ് ഇപ്പോൾ സിന്ധു കൃഷ്ണകുമാർ. കൃഷ്ണകുമാറിന്റെയും സിന്ധുവിന്റെയും രണ്ടാമത്തെ മകളായ ദിയയുടെ വിവാഹം ഈ വർഷം തന്നെ ഉണ്ടാകും എന്നാണ് സിന്ധു വെളിപ്പെടുത്തിയത്.
ഓസി എന്നറിയപ്പെടുന്ന ദിയ യൂട്യൂബ് ചാനലിലൂടെ ആരാധകർക്ക് ഏറെ പ്രിയങ്കരിയാണ്. തമിഴ്നാട് സ്വദേശിയായ അശ്വിൻ ഗണേഷുമായി പ്രണയത്തിലാണെന്ന് ദിയ നേരത്തെ തന്നെ വ്യക്തമാക്കിയിരുന്നു. തിരുവനന്തപുരത്ത് ഒരു ചെറുകിട ഭക്ഷണ സംരംഭം നടത്തിവരുന്ന മീനമ്മയുടെ മകനായ അശ്വിൻ ഗണേഷ് ഒരു ടെക്കി കൂടിയാണ്. ഇരുവരും ഒന്നിച്ചുള്ള പോസ്റ്റുകളും റീൽസുകളും സമൂഹമാദ്ധ്യമങ്ങളിൽ പലപ്പോഴും ശ്രദ്ധ നേടാറുണ്ട്. ഇപ്പോഴിതാ ഇരുവരുടെയും വിവാഹം ഈ വർഷം സെപ്റ്റംബറിൽ ഉണ്ടാവും എന്ന് വെളിപ്പെടുത്തിയിരിക്കുകയാണ് ദിയയുടെ അമ്മ സിന്ധു കൃഷ്ണകുമാർ.
