സൈജു കുറുപ്പിനെ നായകനാക്കി നവാഗതനായ കൃഷ്ണ ദാസ് മുരളി തിരക്കഥയെഴുതി സംവിധാനം ചെയ്യുന്ന ‘ഭരതനാട്യം’ എന്ന ചിത്രത്തിന്റെ ട്രെയിലർ പുറത്തിറങ്ങി. ചിരിപ്പിക്കും രസക്കാഴ്ചകളാണ് ദൃശ്യങ്ങളിൽ കാണാനാവുന്നത്. മനോരമ മ്യൂസിക്കിന്റെ ഔദ്യോഗിക യൂട്യൂബ് ചാനൽ വഴി പുറത്തിറങ്ങിയ ട്രെയിലർ ഇതിനകം പ്രേക്ഷകർ ഏറ്റെടുത്തുകഴിഞ്ഞു. സൈജു കുറുപ്പിനൊപ്പം സായ്കുമാർ, കലാരഞ്ജിനി, മണികണ്ഠൻ പട്ടാമ്പി, അഭിരാം രാധാകൃഷ്ണൻ, നന്ദു പൊതുവാൾ, സോഹൻ സീനുലാൽ, ദിവ്യ.എം.നായർ എന്നിവരും അണിനിരക്കുന്ന ചിത്രമാണ് ‘ഭരതനാട്യം’. ഓഗസ്റ്റ് 23ന് ചിത്രം പ്രദർശനത്തിനെത്തും.
തോമസ് തിരുവല്ലാ ഫിലിംസിന്റെ ബാനറിൽ ലിനി മറിയം ഡേവിഡ്, സൈജു കുറുപ്പ് എന്റർടൈൻമെന്റ്സിന്റെ ബാനറിൽ അനുപമ നമ്പ്യാർ എന്നിവർ ചേർന്നു ചിത്രം നിർമിക്കുന്നു. ബബ്ലു അജു ആണ് ചിത്രത്തിന്റെ ഛായാഗ്രാഹകൻ. എഡിറ്റിങ്: ഷഫീഖ് വി.ബി. സാമുവൽ എ ബി സംഗീതമൊരുക്കുന്നു. കലാസംവിധാനം: ബാബു പിള്ള.
