ഇന്ത്യ 77-ാം സ്വാതന്ത്ര്യദിനം കൊണ്ടാടിയപ്പോൾ വിവിധ രാജ്യങ്ങളിൽ നിന്നുള്ളവരും അതിൽ പങ്കുചേർന്നിരുന്നു. ഇപ്പോഴിതാ ബഹിരാകാശത്ത് നിന്നും, ഇന്ത്യയ്‌ക്ക് സ്വാതന്ത്ര്യദിനാശംസകൾ നേർന്നിരിക്കുകയാണ്. യു.എ.ഇയുടെ ബഹിരാകാശ യാത്രികൻ സുൽത്താൻ അൽ നെയാദിയാണ് രാജ്യാന്തര ബഹിരാകാശ നിലയത്തിൽ നിന്നും ന്യൂ ഡൽഹിയുടെ ചിത്രം പങ്കുവെച്ച് മലയാളമടക്കമുള്ള ഭാഷകളിൽ സ്വാതന്ത്ര്യദിനാശംസകൾ നേർന്നത്.
ലോകമെമ്പാടുമുള്ള ഇന്ത്യക്കാർക്ക് രാജ്യാന്തര ബഹിരാകാശ നിലയത്തിൽ നിന്നും സ്വാതന്ത്ര്യദിനാശംസകൾ! നിങ്ങൾക്കായി ബഹിരാകാശത്ത് നിന്നും ന്യൂഡൽഹിയുടെ ചിത്രങ്ങൾ പങ്കുവെക്കുന്നു, എന്ന അടിക്കുറിപ്പോടെയാണ് സമൂഹ മാദ്ധ്യമമായ എക്‌സിൽ( ട്വിറ്റർ)് അദ്ദേഹം ദൃശ്യങ്ങൾ പങ്കിട്ടത്. ഇതിനുപുറമെ 11 ഇന്ത്യൻ ഭാഷകളിൽ ‘നമസ്‌തേ’ പറഞ്ഞ് ആളുകളെ അഭിവാദ്യം ചെയ്യുന്നതിന്റെ ചിത്രങ്ങളും അദ്ദേഹം പങ്കുവെച്ചിരുന്നു.
രാജ്യാന്തര ബഹിരാകാശ നിലയത്തിൽ ആറുമാസം ചിലവഴിക്കുന്ന ആദ്യത്തെ യുഎഇ ബഹിരാകാശ സഞ്ചാരിയാണ് സുൽത്താൻ അൽ നെയാദി. ബഹിരാകാശത്തിൽ നിന്നും മഞ്ഞു പുതച്ചു കിടക്കുന്ന ഹിമാലയൻ കൊടുമുടിയുടെ ചിത്രങ്ങളും അദ്ദേഹം ഇതിന് മുമ്പ് സമൂഹ മാദ്ധ്യമങ്ങളിൽ പങ്കുവെച്ചിട്ടുണ്ടായിരുന്നു.
