പെട്ടെന്ന് സംഭവിക്കുന്നത് എന്നതാണ് ഹൃദയാഘാതത്തെ ചുറ്റിപ്പറ്റിയുള്ള ഏറ്റവും വലിയ തെറ്റിധാരണ. എന്നാൽ പലർക്കും ഹൃദയാഘാതം സംഭവിക്കുന്നതിന് മണിക്കൂറുകൾ മുൻപ് അല്ലെങ്കിൽ ദിവസങ്ങൾ, ചിലപ്പോൾ ഒരാഴ്ചയോ അതിലധികമോ മുമ്പ് ശരീരം ചില മുന്നറിയിപ്പ് ലക്ഷണങ്ങൾ കാണിച്ചേക്കാം.എല്ലാ ആളുകളിലും ഒരേ ലക്ഷണങ്ങളായിരിക്കണമെന്നില്ല, ചിലർക്ക് നെഞ്ചുവേദനയാണ് പ്രധാന ലക്ഷണമെങ്കിൽ, മറ്റുചിലർക്ക് അസാധാരണമായ ക്ഷീണം, ശ്വാസതടസ്സം, ദഹനപ്രശ്നങ്ങൾ തുടങ്ങിയവ മാത്രമായിരിക്കും അനുഭവപ്പെടുക. ഈ ലക്ഷണങ്ങൾ നേരത്തേ തിരിച്ചറിഞ്ഞ് ചികിത്സ തേടുന്നത് ഹൃദയാഘാതം മൂലമുള്ള ഗുരുതരമായ സങ്കീർണതകളും മരണസാധ്യതയും കുറയ്ക്കാൻ സഹായിക്കും.ഹൃദയാഘാതത്തിന് മുമ്പ് കണ്ടേക്കാവുന്ന പ്രധാന ലക്ഷണങ്ങൾ
അസാധാരണമായ ക്ഷീണം
വലിയ ശാരീരിക അധ്വാനമൊന്നും ചെയ്യാതിരുന്നിട്ടും കടുത്ത ക്ഷീണം അനുഭവപ്പെടുന്നത് ഹൃദയത്തിന് ആവശ്യമായ രക്തവും ഓക്സിജനും ലഭിക്കാത്തതിന്റെ സൂചനയായിരിക്കാം.
രാവിലെ എഴുന്നേറ്റ ഉടൻ ക്ഷീണം
ചെറിയ ജോലികൾ പോലും ചെയ്യാൻ ബുദ്ധിമുട്ട്
വിശ്രമിച്ചിട്ടും ക്ഷീണം മാറാതിരിക്കുക
സ്ത്രീകളിൽ ഈ ലക്ഷണം കൂടുതൽ സാധാരണമായി റിപ്പോർട്ട് ചെയ്യപ്പെടാറുണ്ട്.
നെഞ്ചിൽ അസ്വസ്ഥത അല്ലെങ്കിൽ വേദന
ഹൃദയാഘാതത്തിന്റെ ഏറ്റവും സാധാരണ ലക്ഷണമാണിത്.
നെഞ്ചിൽ അമർത്തുന്നതുപോലുള്ള അനുഭവം
നെഞ്ചെരിച്ചിൽ തോന്നുക
ഭാരമുള്ള വസ്തു നെഞ്ചിൽ വെച്ചിരിക്കുന്നതുപോലെ തോന്നുക
വേദന വരികയും പോകുകയും ചെയ്യാം
ചിലപ്പോൾ ഇത് വളരെ നേരിയ അസ്വസ്ഥത മാത്രമായിരിക്കാം.
ശ്വാസതടസ്സം
നടക്കുമ്പോഴോ പടികൾ കയറുമ്പോഴോ മാത്രമല്ല, ചിലപ്പോൾ വിശ്രമിക്കുന്ന സമയത്തുപോലും ശ്വാസംമുട്ടൽ അനുഭവപ്പെടാം. ഇത് ഹൃദയത്തിന്റെ പമ്പിങ് ശേഷി കുറയുന്നതിന്റെ സൂചനയായിരിക്കാം.
കൈ, തോൾ, കഴുത്ത്, താടി എന്നിവിടങ്ങളിലേക്കുള്ള വേദന
നെഞ്ചിലെ വേദന ഇടത് കൈയിലേക്ക് വ്യാപിക്കുന്നതായി തോന്നും. പിന്നീട് വലത് കൈയിലേക്ക്, തോൾ, കഴുത്ത്, താടി, പുറംഭാഗം എന്നിവിടങ്ങളിലേക്ക് വ്യാപിക്കാം. ചിലരിൽ നെഞ്ചുവേദനയില്ലാതെ ഈ ഭാഗങ്ങളിൽ മാത്രം വേദന അനുഭവപ്പെടാറുണ്ട്.
അമിതമായി വിയർക്കുക
യാതൊരു കാരണവുമില്ലാതെ വിയർക്കുക
ശരീരം ഒട്ടിപ്പിടിക്കുന്നതുപോലുള്ള വിയർപ്പ്
ഇത് അടിയന്തരമായി ശ്രദ്ധിക്കേണ്ട ലക്ഷണമാണ്.
ദഹനക്കേട് അല്ലെങ്കിൽ നെഞ്ചെരിച്ചിൽ
പലരും ഇത് ഗ്യാസ് പ്രശ്നമാണെന്ന് തെറ്റിദ്ധരിക്കാറുണ്ട്.
വയറിന് അസ്വസ്ഥത
നെഞ്ചെരിച്ചിൽ
ഓക്കാനം
ഛർദ്ദി
പ്രത്യേകിച്ച് സ്ത്രീകളിൽ ഇത് ഹൃദയാഘാതത്തിന്റെ ആദ്യ സൂചനയായിരിക്കാം.
ഉറക്കപ്രശ്നങ്ങൾ
ചിലർക്ക് ഹൃദയാഘാതത്തിന് മുമ്പ്:
ഉറങ്ങാൻ ബുദ്ധിമുട്ട്
രാത്രിയിൽ പലതവണ ഉണരുക
അസ്വസ്ഥത അനുഭവപ്പെടുക എന്നിവ ഉണ്ടാകാം.
ഹൃദയമിടിപ്പ് അസാധാരണമാകുക
ഹൃദയം വേഗത്തിൽ മിടിക്കുക
മിടിപ്പ് തെറ്റുന്നതുപോലെ തോന്നുക
നെഞ്ചിൽ വിറയൽ അനുഭവപ്പെടുക
ഇത് ഹൃദയത്തിലെ വൈദ്യുത പ്രവർത്തനത്തിലെ പ്രശ്നങ്ങളുടെ സൂചനയായിരിക്കാം.
സ്ത്രീകളിലും പുരുഷന്മാരിലും ലക്ഷണങ്ങൾ വ്യത്യസ്തമാകാം
സ്ത്രീകളിൽ:
ക്ഷീണം
ശ്വാസതടസ്സം
ഓക്കാനം
പുറംവേദന
താടി വേദന
ദഹനക്കേട് എന്നിവ നെഞ്ചുവേദനയേക്കാൾ കൂടുതലായി കാണപ്പെടാം.
പുരുഷന്മാരിൽ:
ശക്തമായ നെഞ്ചുവേദന
ഇടത് കൈയിലേക്ക് വേദന
അമിത വിയർപ്പ് കൂടുതൽ സാധാരണമാണ്.
ലക്ഷണങ്ങളെ ഒരിക്കലും അവഗണിക്കരുത്. ഉടൻ ഡോക്ടറെയോ അടുത്തുള്ള ആശുപത്രിയെയോ സമീപിക്കണം. നെഞ്ചുവേദന അഞ്ച് മിനിറ്റിലധികം നീണ്ടുനിൽക്കുകയോ ശ്വാസതടസ്സം, തണുത്ത വിയർപ്പ്, തലകറക്കം എന്നിവയോടൊപ്പം വരികയോ ചെയ്താൽ അടിയന്തര വൈദ്യസഹായം തേടുക. സ്വയം വാഹനമോടിച്ച് ആശുപത്രിയിലേക്ക് പോകുന്നതിന് പകരം കഴിയുമെങ്കിൽ ആംബുലൻസ് സേവനം ഉപയോഗിക്കുക.
ഹൃദയാഘാതം തടയാൻ ശ്രദ്ധിക്കേണ്ട കാര്യങ്ങൾ
ദിവസവും കുറഞ്ഞത് 30 മിനിറ്റ് നടക്കുകയോ വ്യായാമം ചെയ്യുകയോ ചെയ്യുക.
പച്ചക്കറികളും പഴങ്ങളും ധാന്യങ്ങളും അടങ്ങിയ സമീകൃത ഭക്ഷണം കഴിക്കുക.
പുകവലിയും പുകയില ഉൽപ്പന്നങ്ങളും ഒഴിവാക്കുക.
രക്തസമ്മർദ്ദം, പ്രമേഹം, കൊളസ്ട്രോൾ എന്നിവ നിയന്ത്രണത്തിൽ സൂക്ഷിക്കുക.
ആവശ്യമായ ഉറക്കം ഉറപ്പാക്കുക.
മാനസിക സമ്മർദ്ദം കുറയ്ക്കാൻ യോഗ, ധ്യാനം തുടങ്ങിയവ ശീലമാക്കുക.
ഡോക്ടർ നിർദേശിക്കുന്ന ആരോഗ്യപരിശോധനകൾ കൃത്യമായി നടത്തുക.
